Desque en 1984 a Asociación de Funcionarios promovera unha intensa actividade para que a lingua galega fose o código máis común de comunicación no procedemento administrativo local, foi estendéndose e hoxe podemos afirmar con certeza que está plenamente normalizada. Sen embargo, este proceso imparable non foi uniforme. É o caso da Administración de Xustiza. Xulgados e tribunais de xustiza quedaron á marxe do proceso por diversas razóns. Unha delas, sen dúbida, foi o feito de ser a Xustiza de competencia estatal. Razón abondo esgrimida, que entra en contradición cos dereitos lingüísticos dos cidadáns galegos, que teñen amparo na xurisprudenza ditada.

Leis de ámbito estatal e autonómico regulan o uso da lingua galega na Administración de Xustiza. Sen embargo, os receos dos funcionarios e funcionarias xudiciais  foron, e seguen a ser aínda, un freo para a normalización lingüísticoa nos usos xurídicos.

A Asociación de Funcionarios para a Normalización lingüística preocúpase de motivar o uso da lingua galega nos ámbitos público e privado do Dereito.