Se o labor de D. Álvaro de las Casas Blanco foi importante para achegar á mocidade ós ideais do galeguismo, a Asociación Álvaro das Casas, seguindo a súa estela propúxose recuperar, na Comarca do Ribeiro, os MAIOS que levaban máis de 30 anos sen facerse. A recuperación iniciouse no ano 2004 convocando o primeiro concurso e animando a participar na festa tódolos centros de ensino dos concellos de Ribadavia, Cenlle, O Carballiño, etc….
Para presentar a proposta e ir fortalecendo a idea entre profesores e nenos, a Asociación Álvaro das Casas presentou no ano 2004 na Casa da Cultura do Concello de Ribadavia, un video sobre os maios con guión de Clodio González Pérez e autoría de Pío García e que foi divulgado polos colexios da zona.
O traballo constante de Celso Domínguez –auténtico motor desta recuperación- e o apoio do Concello de Leiro está facendo que cada ano a participación sexa maior, se a iso engadimos a ilusión coa que os veciños e veciñas da zona apoian aos rapaces na construción dos maios, dámonos conta de que a recuperación da tradición, perdida durante tanto tempo, vai por bo camiño.